港聞

港聞二

上一篇

馬時亨喜迎龍鳳孫

【明報專訊】港鐵主席馬時亨最近被港鐵事故搞到一頭煙,但Emily相信佢呢兩日心情應該好好,因為佢迎來一對龍鳳胎外孫出世。馬時亨個女馬露明前日生咗對龍鳳胎,取名劉智恩及劉智灝,名字寓意神賜嘅恩典同智慧。雙喜臨門,再次抱孫嘅馬時亨夫婦祝願一對外孫健康快樂成長。

名字寓意神賜恩典同智慧

馬時亨女婿係全仁醫學診斷中心創辦人兼放射科專科醫生劉仲恒,佢再度榮升爸爸後,噚日透過公關公司發稿話自己多咗對龍鳳胎仔女,同大家分享喜悅。劉仲恒話3歲長子對於迎接細佬妹出世表現得非常興奮及期待,更喺過去多個月努力練習結他,計劃用音樂歡迎一對弟妹返屋企。

劉仲恒同馬露明都係虔誠教徒,夫妻異口同聲話「非常希望小朋友有日可以認識上主」。劉仲恒身兼母乳委員會成員,同馬露明一向支持推動母乳餵哺,佢哋話會身體力行,為一對龍鳳胎提供最好嘅營養同保護。

相關字詞﹕馬時亨

上 / 下一篇新聞