港聞

港聞二

下一篇
上一篇

為慳幾百 劉鎮漢媽媽購物團使幾萬

【明報專訊】購物團問題困擾香港,原來連旅遊發展局總幹事劉鎮漢(Anthony)嘅家人都中招。話說Anthony媽媽近日由加拿大返港,原本機票大約800加元,劉媽媽發現一個飛去上海嘅旅行團只係650加元,仲住足6晚上海Ritz-Carlton,抵到爛,於是參加,之後再飛返香港探家人。

Anthony話喺機場接機已覺奇怪,點解咁多行李?原來劉媽媽參加嘅係購物團,佢買咗10張棉胎,仲話張棉胎會愈冚愈薄,愈冚愈暖。劉鎮漢心知不妙,細問下發現每張棉胎3000幾蚊,10張就要成3萬幾蚊。劉媽媽仲買咗一堆藥油,慳咗百幾蚊加幣機票,結果買嘢使咗幾萬銀。

大灣區覓食 未食知好嘢

另外,Anthony最近推廣大灣區同香港一程多站旅遊,想用珠海、中山同廣州嘅美食吸客,於是親身到當地試吓網紅推介食店,其中廣州一家中菜廳以筍殼魚出名,Anthony仲叫咗碗白飯撈魚汁食,點知佢飯都未食,就話係好嘢。同行嘅Emily都試吓,確係又軟又糯,對於Anthony可以一眼就睇得出碗飯係龍定鳳,Emily佩服得五體投地。

上 / 下一篇新聞