港聞

港聞二

下一篇
上一篇

《明報》鄭若驊僭建報道再獲新聞獎

【明報專訊】《明報》偵查專題組憑去年嘅「鄭若驊僭建風波」系列報道繼早前奪得報業公會新聞獎後,再奪得第10屆金堯如新聞自由獎嘅紙媒網媒組優異獎。偵查組3名同事呂耀焜(已離任)、張煒明同羅霈潁噚日喺頒獎禮分享報道期間嘅挑戰,話最難係點樣證實鄭若驊嘅獨立屋確有僭建地庫。

刊登前一晚先影到神秘樓梯

佢哋話,曾經放蛇去過鄭若驊隔籬屋實地考察,證實其他獨立屋有僭建地庫,但攝記連日喺鄭若驊屋外都無辦法影到屋內嘅僭建地庫,直至報道刊登前一晚,先至影到呢條懷疑係通向僭建地庫嘅神秘樓梯。佢哋同Emily講,獨立屋嘅玻璃窗會反光,有時又會拉埋窗簾,最後能夠影到呢張相都真係需要運氣。

《蘋果日報》調查組則憑《沙中線工程醜聞》系列獲得紙媒網媒組大獎。至於電台電視組嘅大獎就由有線電視中國組首席記者黃慧茹嘅《改革開放四十年》報道系列奪得,now新聞台專題組策劃陳偉利,就憑回顧汶川大地震10周年嘅報道《掩埋的真相》獲得優異獎。

大會話今年破紀錄收到69份參賽作品,金堯如新聞基金管理委員會主席程翔仲話,基金得到金堯如長子金渡江捐助,會將10年嚟嘅得獎新聞作品結集成書,希望可以成為新聞系學生嘅參考資料。

上 / 下一篇新聞