港聞

港聞二

下一篇
上一篇

考牌3次終過關 譚文豪加入的士業大軍

【明報專訊】本身係飛機師嘅公民黨譚文豪(Jeremy),考其他交通工具嘅牌,又係咪好易呢?佢噚日透露,過去考咩牌都「一take pass」,點知的士牌佢竟然要考3次,噚日終於考牌成功。

過去考咩牌都一take pass

唔通飛機師要轉行揸的士?Jeremy話想「成為的士業界」,因為佢做咗的士服務質素委員會委員,想知道點解入行咁難,於是試吓去睇吓的士牌係咪咁難考,仲話單係排期報名考,都搞咗成年。

的士牌點難考法?Jeremy出咗個考試題目,問大家知唔知「螢幕圈」喺邊,原來係喺紅磡,但連九龍西議員毛孟靜都被考起。Jeremy話,的士司機話最難係街道名,而佢之前唔及格係「衰」交通例,前者20條題目可以錯2條,後者則考100題,只可以錯5條。

體驗一更 唔會拒載

Jeremy話運輸署提供一本《地方試題小冊子》,考試基本上要背熟當中650個地方嘅位置甚至係街道名,佢覺得咁考法無咩意思,因為今時今日要知道街名Google都搵到,認為應該改為考由甲地點去乙地點行咩路仲實際。佢話現時考法嘅及格率只得三成,自然就少人入行啦。

Jeremy話稍後會搵日租架的士,體驗揸一更,強調「唔會拒載」。

上 / 下一篇新聞