港聞

港聞二

下一篇
上一篇

志明與二少 為1分鐘嗌交

【明報專訊】立法會鐵路事宜小組噚日開會,討論港鐵荃灣線測試信號系統時撞車,同埋沙中線紅磡站調查委員會嘅中期報告,結果實政圓桌田北辰就因為發言時間問題,同小組主席、自由黨易志明針鋒相對。

嬲發言時間少過陳淑莊

話說易志明規定每個議員有4分鐘時間發言,「連答問題」,公民黨陳淑莊追問政府官員同埋港鐵有關沙中線嘅問題時,同官員來回答問,令發言時間超過咗5分鐘。

民主派議員嘩然

緊隨其後發言嘅田北辰好不滿,要求主席都要畀5分鐘佢發言。易志明重申每人只有4分鐘,田北辰拋出一句「咁樣做主席」。易志明都不甘示弱,即刻回敬話「咁你下次選喇」。此話一出,在場嘅民主派議員都嘩然,田北辰更加不滿:「嘩,大我𠻹呀?係,我唔夠你多票。」

田北辰係上一年度嘅鐵路小組主席,上年10月立法會復會時,就有消息話建制派不滿田北辰對港鐵做法及主持會議手法,唔支持佢做,主席一職就由易志明接任。

噚日會議上,工聯會陸頌雄為港鐵前線員工抱不平,話前線喺荃灣線撞車事故時,日以繼夜加班48個鐘,但港鐵只補水10個鐘,加100蚊超市禮券,佢批評做法剝削員工,「主席(馬時亨)去咗打高爾夫球喎,士氣問題咪咁出嚟囉!」

馬時亨話北上探友唔係打波

馬時亨早前同Emily喊冤,話當日被指去打波,其實係去北京探望抱恙嘅朋友,而唔係去打高爾夫球,又話當時更無帶高球袋,形容傳媒刊登嘅相,其實相中佢帶嘅唔係高球袋,慨嘆有被「屈」嘅感覺。港鐵中人則替主席補充,話主席去年底病後,至今一直都無打過波呀。

上 / 下一篇新聞