港聞

港聞二

下一篇
上一篇

《廉政行動》下月播 鄭則仕扮貪官

【明報專訊】前政務司長許仕仁收受新地前聯席主席郭炳江等提供利益案,轟動一時。Emily收到風,下個月開始播出嘅劇集《廉政行動2019》,其中一個故事,就係由一宗政府前高官「官商勾結」案件改編而成,主角由鄭則仕(Kent哥)飾演。

廉署同無綫合作拍攝嘅《廉政行動2019》,將會喺下月6日,一連5個周六晚上9點半播放,講述4單案件,而最尾一宗案件《黃金枷鎖》更係分為上下集嘅重磅古仔。故事講述一個大集團過去一直安排高官靳東堯(鄭則仕飾)免費入住豪宅,有收受利益之嫌。由藝員陳家樂同陳瀅飾演嘅廉署調查員,就要同佢展開一場智慧博弈,誓要將佢繩之於法。

廉署社區關係處總傳媒宣傳創作主任羅香蘭話,劇集內嘅故事全部都係由真實案件改編而成,創作團隊為咗深入了解主角嘅犯案心理、性格、神態,特別請教負責該案件嘅調查員,參考番角色原型咁話。唔怪得Emily睇劇照同預告片時,愈望Kent哥就愈覺得似某名前高官。廉署話,想透過劇集教育公眾,不論貪污大小,都會禍害社會,市民切勿以身試法。

相關字詞﹕廉政行動2019 廉政公署

上 / 下一篇新聞