港聞

港聞二

上一篇

葉劉臥病公告網民 容海恩代提質詢

【明報專訊】新民黨主席、行政會議成員葉劉淑儀原本噚日會喺立法會提出口頭質詢,關注副局長同政治助理嘅工作,相信唔少人都「期待」葉太會點向班副局同政助「開火」,但原來佢病咗,要由黨友容海恩代問。葉太噚日朝早喺facebook話前日睇醫生,並發燒到39℃。葉太無現身開會,聽聞佢有喺屋企睇立法會會議直播。

葉太話上周到格魯吉亞及匈牙利參加為期6日嘅商務考察團,當地天氣寒冷,早晚溫差大,一唔小心就冷親,其間已身體不適,不斷流鼻水同有感冒徵狀。佢話返港後咳嗽同流鼻水加劇,周一晚開始發燒,求診時醫生即時開咗抗生素同特敏福等,食藥後稍退燒,但仍肌肉痠痛,覺得好攰,醫生叮囑佢休息最少3日。葉太話由於抱恙,本周二已經唔可以出席行政會議,現時只好臥牀休息,希望身體盡快復元,重投工作。

相關字詞﹕容海恩 葉劉淑儀 新民黨

上 / 下一篇新聞