港聞

港聞二

下一篇
上一篇

湊人數傾國歌法 工務小組喊暫停

【明報專訊】立法會不時出現同一時間召開幾個會議,令議員有時要唔同會議兩邊走,好似噚日工務小組同國歌法草案委員會會議,同樣都係朝早8點半開會,國歌法草案委員會所需法定人數要超過21,一直唔夠人令會議未能開始,工務小組主席盧偉國本身都係草案委員會嘅成員,唔知係咪擔心另一會議流會大家都要被問責,佢主持工務小組時就決定暫停會議,等大家齊齊去另一會議室湊人數。

立法會嘅委員會須有三分之一以上委員出席,先可以開始會議,睇落門檻唔算好高,不過國歌法委員會委員多達64人,所以法定人數須達21以上。而工務小組就為此暫停咗3分鐘,最終兩邊會議都同時進行。

國歌法草案委員會上傾到推廣國歌納入中小學教育相關嘅問題,教育局首次派官員出席,由副局長蔡若蓮上陣,會上唔少議員表達憂慮;蔡若蓮話條例精神係希望教識學生要認識同尊重國歌,點教、幾時教完全係學校自主。

相關字詞﹕工務小組 國歌法 emily

上 / 下一篇新聞