港聞

港聞二

下一篇
上一篇

反擊朱凱廸 劉業強:93%鄉委有民意基礎

【明報專訊】立法會議員朱凱廸早前打住「民主透明、革新鄉政」嘅旗號參加鄉郊代表選舉,被指隱晦地支持港獨而被DQ。佢噚日喺立法會提出質詢,發言提到現時鄉事委員會主席,可以做埋區議會當然議員、特首選舉選委,但鄉委會嘅組織章程、運作都唔透明,又話自己作為八鄉村民,都唔知八鄉鄉委會章程。鄉議局主席劉業強(圖)提問時就趁機反駁,話有93%鄉委會委員係經鄉郊代表選舉產生,有民意基礎,鄉委會選舉都有依章程法則進行,所以唔係欠缺透明度。

民政事務局長劉江華回答時話,鄉委會選舉有一定章程規範運作、有選舉法則,選舉過程有民政專員作為選舉主任睇住,確保選舉公平公正;而鄉委會運作方面都有章程、法例可以應用。佢又話,鄉郊選舉有歷史傳統,政府尊重,但亦會與時並進,吸納社會意見,喺鄉議局今年6月換屆後,將社會意見帶到鄉議局磋商,研究點樣進一步改善鄉郊選舉。

劉業強早已表明有意競逐連任鄉議局主席,而副主席張學明就好大可能唔競逐連任副主席。Emily會後問劉業強睇好邊個做張學明接班人,佢話27個鄉委會選舉未完,無正面回應邊個係佢心水副手。

相關字詞﹕劉江華 劉業強 新界鄉議局 鄉事委員會 朱凱廸

上 / 下一篇新聞