港聞

港聞二

下一篇
上一篇

李永達「寫」回憶錄靠把口

【明報專訊】「佔中九子案」將於下月9日裁決,被告之一、民主黨前主席李永達近日出版新書《判刑前的沉思》,記錄多年從政經歷。阿達噚日舉行新書發布會,透露呢本書係對住iPhone「口述」咁讀出嚟寫成。阿達年過60,用起新科技毫不落後,仲話如果要坐監,喺監獄冇得用iPhone,相信寫下集會有困難。

阿達今次新書爆料不少,包括講番當年司徒華嘅古仔、共產黨點「滲透」民主派等;佢話自己行山時拎住手機,將想寫嘅內容讀出嚟,仲笑言手機將語音轉做文字準確度足足有六成,就算佢咁多懶音都冇問題。

阿達出新書,唔少黨友同政界朋友都有撐場。同案被告、立法會社會福利界議員邵家臻話希望判刑後可以同阿達身處同一個監獄,得閒望吓佢放風、打籃球,或者扮籃球畀人打,「寒冬有杯茶飲吓都唔錯」。

民主黨劉慧卿就叫阿達坐監時不如寫第二本,但工黨李卓人隨即話「我驚佢唔識(寫),因為裏面冇iPhone」。阿達都承認有機會嘅話想寫第二本,但監獄內冇得用手機會有困難,不過都可以寫定大綱、筆記先嘅。

黃碧雲:冇理由唔告民主黨

一眾阿達好友輪流發言,其間黨友黃碧雲竟然話見到阿達畀人告時「好開心」,佢話民主黨真係有參與運動,努力學非暴力抗爭,「冇理由唔告民主黨」,又話如果民主黨冇畀人告,實畀人話被收買、冇出力,所以知道阿達被告後,碧雲一見到佢就攬住話「好彩有告你」,感激阿達為所有民主黨唔使坐嘅人「頂一刀」。阿達就笑住話,「畀佢攬時我有啲驚」。

上 / 下一篇新聞