港聞

港聞二

上一篇

8校獲fb贈VR裝置 學生遊太空

【明報專訊】facebook噚日宣布同加油香港基金合作,第一次向8間本地中學捐出虛擬實境頭戴式裝置Oculus,令呢個科技融入本地教學。

地理堂可帶學生到現場

每間中學分別獲贈3部虛擬實境頭戴裝置,同埋一部360度全景相機。facebook香港、台灣及蒙古國公共政策總監陳澍話,將虛擬實境同教育結合會令教學更加生動,舉例「當老師上地理堂時,可以用裝置『帶學生到現場』」。

加油香港基金創辦人周佩波就話,學生家庭背景唔同,唔係個個負擔得起機票到外地考察,但虛擬實境打破咗呢個界限。今次計劃係試驗性質,周佩波希望幾間中學可以分享經驗,成為其他學校喺STEM教育上嘅模範。

庇理羅士女子中學嘅歐陽同學對天文學有深厚興趣,噚日第一次接觸虛擬實境技術,睇有關星體同黑洞形成嘅影片。佢形容「過程好似置身太空中,360度畀星星包圍」。以往喺香港難有機會接觸天文知識,加上光污染嚴重,好少機會觀星,佢期待喺課堂用到呢個裝置。

上 / 下一篇新聞