港聞

港聞二

下一篇
上一篇

Ann姐巧遇師妹 憶那兒開花一十一

【明報專訊】一班德望學校小學部學生噚日參觀立法會,民建聯議員蔣麗芸(Ann姐)經過就一個箭步走埋去,主動問班正四處張望嘅學生係咪想搵議員影相,仲考佢哋知唔知邊位立法會議員都係讀德望。不過班學生似乎唔係好知道佢哋眼前嘅Ann姐,原來正係佢哋師姐。被一班師妹簇擁嘅Ann姐笑得好開心,學生仲即場演唱英文校歌畀Ann姐聽,Ann姐冇跟住唱,但就喚起咗當年嘅德望生活。

學生似乎唔知Ann姐係師姐

德望學校1954年創校,Ann姐話當年讀小學,朝朝早都喺操場聽修女校長讀經文、禱告,唔少同學仔家境都唔錯,放學時有私家車接送,而佢就坐保母車。喺呢間名校入面,Ann姐話同學都可以用流利嘅英文對答,而佢嘅成績只係中等,之後因為屋企經濟情况轉差,轉咗去秀茂坪一間屋邨小學,英文唔使點溫都100分,成績即刻變得好好。

Ann姐話當年佢哋會一邊玩一邊學習,最記得係一邊跳橡筋繩,一邊背數字。佢噚日示範個口訣,邊踏地邊念:「小皮球、香蕉油……」。

上 / 下一篇新聞