港聞

港聞二

上一篇

迪士尼產品銷情 Marvel不敵米奇

【明報專訊】迪士尼咁多卡通人物,咁多產品,如果Emily問你知唔知邊款最好賣,你估唔估到呢?話說Emily前幾日同迪士尼嘅銷售代表傾偈,發現原來近期聲勢浩大嘅Marvel,喺銷售榜只係排第四,第一始終係米奇與好友系列。

Duffy與公主系列排二三

迪士尼樂園度假區商品營運綜合策劃經理陳偉賢(Justin)分享產品銷售榜排名,最好賣嘅當然係樂園主角米奇系列,其次係近來好多年輕女仔都好喜歡嘅Duffy與好友系列,第3係迪士尼公主系列,Marvel得第4!

話雖如此,Marvel銷售升勢都十分凌厲。Justin話,自從迪士尼2012年引入Marvel系列後,每年Marvel產品銷售量持續有雙位數字增長,特別係2017年推出「鐵甲奇俠飛行之旅」,當年就有過五成嘅銷售額增長,證明Marvel魅力的確不可擋。

迪士尼確認,最新嘅Marvel遊樂設施「蟻俠與黃蜂女:擊戰特攻!」今個月31號就開,相信一班Marvel迷都好期待。迪士尼樂園度假區商品總監林齊娟(Mary)話畀Emily知,28號將推出40款香港迪士尼獨有嘅主題商品。Justin話呢40款產品,從設計到面世足足用咗一年,Marvel仲特登設計獨家logo,認住神盾外面有個紅圈,得香港迪士尼先有呀。

上 / 下一篇新聞