港聞

港聞二

下一篇
上一篇

港隊前教練組隊 基層生追風追夢

【明報專訊】講起單車,大家可能會諗起「牛下女車神」李慧詩。曾經係佢教練嘅港隊前單車教練曾啟明(明sir)退休後,同港隊前隊員曾曉彤、袁智浩等約兩年前成立車隊「Supernova」,發掘更多有潛質嘅青少年。曾曉彤同Emily講,現有約30名隊員,主要為12至18歲,大多透過網上接觸加入車隊。部分隊員嚟自低收入或單親家庭,有啲亦唔鍾意返學、掛住打機等,但後來睇住單車令佢哋改變!

16歲嘅中四生梁悅嚟自單身家庭,靠媽咪養活佢、哥哥同家姐。梁悅話,細個時就算問媽咪拎1元去文具店玩彈波波都唔敢,但自細就對單車好有興趣,兩年幾前想加入車隊,知道費用約4位數字後,佢驚咗3日先敢問阿媽,阿媽靜雞雞睇吓收喺櫃入面嘅私己錢後,都係答應畀佢追夢。梁悅又話,初初入隊著住波鞋去,頭盔、手套乜都無,靠車隊借出器材,而明sir幫手搵合適同較相宜嘅單車等等。經訓練後,梁悅舊年入選港隊青訓,更喺1月亞洲場地單車錦標賽奪得青年組女子團體追逐賽亞軍。佢將轉為全職運動員,期望日後可在大賽獲個人獎。

教練自掏荷包買器材

明sir話明白部分隊員有經濟困難,所以會盡量協助,例如曾為男隊員先出錢買單車。車隊現有約4名教練,為咗車隊,教練亦會自掏荷包買器材借畀隊員。

本月24日中環龍和道會舉行維特健靈慈善單車馬拉松,Supernova有份參賽,大家到時可以一睹運動員路上爭拼喇!

上 / 下一篇新聞