港聞

港聞二

下一篇
上一篇

阿強力證阿公冇DQ下籤 話今年果支係「中吉」

【明報專訊】每逢大年初二,鄉議局主席劉業強都會去車公廟為香港求籤。唔少人都質疑究竟有無造假,特別係事前抽起晒啲下籤,劉業強噚日就解答,4年前開始已經攤晒96支籤出嚟任大家睇,好似六合彩攪珠咁公正,佢仲即時展示相片,力證下籤冇被「DQ」。劉業強又透露有人講過求籤好大壓力,叫佢唔好求,但佢就認為傳統都值得繼續做。

96支籤影相為證

劉業強今年求得86號籤,佢形容係「中吉籤」,又話首句「石田為業喜非常」中嘅「石田」其實非常有用,因為「石田」意味可以發展,又強調長線土地發展應該填海。但有玄學家話籤文意味「明日大嶼」係畫餅充飢?劉業強就話「明日大嶼」係願景,就算填海都冇咁快開始到,但係如果唔支持,就永遠都行唔到第一步。

話野豬失控 或要出獵隊

近年野豬問題備受關注,劉業強早前建議引入天敵對付,佢噚日形容野豬已經有少少失控,因為佢哋生命力強,就算畀車撞到都冇事,亦已令唔少人受傷,仲話有93歲村民喺屋企發現野豬,徒手趕豬後被𠝹傷。劉業強強調如果現行方法處理唔到數目,就一定要積極啲,例如野豬狩獵隊現時停止運作兩年,如果野豬數目持續上升,都要再做啦。

相關字詞﹕求籤 車公廟 鄉議局 野豬 明日大嶼

上 / 下一篇新聞