港聞

港聞二

下一篇
上一篇

參選村長 工黨常委何偉航落敗

【明報專訊】鄉郊代表選舉一連3個周日舉行,今次選舉唔少民主派參選,包括以「盡快研究丁權截龍」為政綱嘅工黨常委何偉航(Stanley),最終佢得7票落敗,佢透露對手黃來生以47票勝出,另一對手黃建文就獲20票,相信對手選票都係來自佢哋家族。

以「盡快研究丁權截龍」為政綱

Stanley話呢個結果都係預料之內,雖然有啲可惜,但唔會氣餒。佢相信落敗最大原因係冇面對面接觸選民,只能寄信溝通,未來都要多諗方法接觸,又強調一定會「永續參選」鄉郊代表,亦認為今次多咗民主派參選,令鄉郊選舉更受關注,相信所有嘢都係要慢慢改變。

立法會議員何君堯亦有參選良田村嘅原居民代表競逐連任,佢喺facebook透露自己以79票對71票勝出,保住村長位置,「的確是個好值得反思的結果,必須洗心革面」。

根據政府統計,噚日選舉由108條村嘅367名候選人競逐195席,當中129席係原居民代表、66席係居民代表;整體投票率62.12%。

上 / 下一篇新聞