港聞

港聞二

下一篇
上一篇

區會補選漸近 泛民發動揮春攻勢

【明報專訊】農曆新年將至,唔少地區工作者都開始落區為街坊寫揮春,噚日太子地鐵站外更有多達10名現任、前任立法會議員現身,場面墟冚。何解咁熱鬧?油尖旺區議會大南選區補選預料3月或4月舉行,積極考慮參選嘅民主派地區組織「社區前進」成員李國權,噚日邀請一眾泛民朋友出席呢次活動,但佢強調今次唔係造勢,邀請嘉賓時亦無提及補選,今次係希望透過活動多啲接觸街坊,令佢哋認識「社區前進」咁話。

10名現任前任議員齊齊寫

活動邀得現任立法會議員張超雄、邵家臻、毛孟靜、范國威同葉建源捧場,前議員就有李卓人、姚松炎、梁國雄、羅冠聰同劉小麗,社區前進其他成員亦有現身。李國權話,活動籌備咗一個多星期,希望同街坊拜個早年,自己以前同各嘉賓都有合作過。

疑似對手近期積極曝光

另邊廂,好大機會代表建制派出選大南嘅經民聯社區主任李思敏,近期亦積極爭取曝光,本月初同黨友召開記者會,公布公立醫院急症室輪候時間調查,要求政府檢視醫療系統。

葉建源揮春靈驗

講開寫揮春,葉建源近日應同屬專業議政嘅梁繼昌(Kenneth)要求,幫Kenneth個仔寫揮春,4張揮春分別寫上「學業進步、出入平安、得心應手、紅軍勝利」。原來Kenneth個仔係英超球隊利物浦球迷,葉sir寫完揮春後兩日,利物浦就重返勝軌,睇嚟揮春相當靈驗。

上 / 下一篇新聞