港聞

港聞二

下一篇
上一篇

民主黨黨慶 唔請特首鄭若驊

【明報專訊】民主黨3月19日舉辦黨慶,上年黨慶因為邀請特首林鄭月娥(圖),林太即席捐出3萬蚊一事引起爭議。據Emily了解,民主黨今年黨慶,無論酒會、晚宴,都唔會邀請林太同律政司長鄭若驊,意味捐款一幕唔會再現,其他問責官員則會邀請。副主席羅健熙話,唔請嘅原因係𠵱家時機不太適合,有好多不同原因綜合考慮。

有中委透露,會上大家一致認為,全盤考慮現時政治形勢,所以作出呢個決定。舊年就因為林太初上任,以往政府決定難以完全入佢數,認為可以畀機會同空間佢,所以伸出「友誼之手」;但黨友考慮到林太上任後有好多變化,例如任內繼續DQ議員、律政司冇起訴前特首梁振英等,加上林太噚日喺特首答問會上繼續為鄭若驊護航,令黨內有強烈意見,唔願意邀請兩人出席黨慶。另外有中委表示,今年係選舉年,咁嘅政治形勢下好難同林太走得近。據Emily所知,民主黨內部對於請唔請官員一向都有爭議,認為應該請嘅,主要顧慮到商界諗法,如果顯示到該黨同政府都算有得傾,籌款時都會比較容易;認為唔應該請嘅,就係顧慮近期政治形勢,尤其係《國歌法》同鄭若驊等事件。

相關字詞﹕律政司 鄭若驊 emily 民主黨 林鄭月娥

上 / 下一篇新聞