港聞

港聞二

下一篇
上一篇

《幾分傷心幾分癡》改歌詞 二創MV 「啜毛姨姨」反填海

【明報專訊】歌手王傑嘅《幾分傷心幾分癡》街知巷聞,近期有網民改編歌詞,變成《啜毛姨姨》,諷刺政府嘅「明日大嶼」計劃,其中將歌詞首句「哭泣聲絕無意義」改成「哭泣聲啜毛姨姨」,將民主派會議召集人毛孟靜(Miss Mo)「拉埋落水」。網民改歌並非新鮮事,不過Miss Mo今次就應邀請,現身網民操刀嘅音樂短片,佢無開金口唱歌,全程表現得好開心,更向Emily盛讚網民創意無限,幾近專業水準。

網民早於去年10月已經去Miss Mo嘅議員辦公室拍片,但短片直至噚日先上載至「高登音樂台」facebook專頁。片中所見,網民向Miss Mo提供嘅歌詞紙有唔少錯字,搞到Miss Mo要不斷指正;歌詞提到明日大嶼要花幾千億元,Miss Mo拍片時就同網民講:「咩幾千億?1萬億呀!」

Miss Mo指正錯字 讚網民創意

講番首歌,歌詞首句係「哭泣聲啜毛姨姨,公帑浪費幾千億多爭議,但市民反應都好似好參差」,網民就強調「啜」係啜泣咁解;歌詞質疑明日大嶼成本過高,「到底使幾千億等於幾錢,快用完儲稅數載的所有錢,埋尾計數計到超支點算先?」短片貼出後,唔少人讚Miss Mo好玩得,有網民話想聽佢親口唱一次𠻹。

相關字詞﹕明日大嶼 毛孟靜

上 / 下一篇新聞