港聞

港聞二

下一篇
上一篇

提動議唔見人 楊岳橋被嘲「關鍵缺席」

【明報專訊】公民黨楊岳橋(AY)原定噚日動議檢討單程證政策嘅議員議案,仲先後開傳媒茶敘、喺facebook同instagram預告,不過噚日立法會進度好快,去到呢項議程時,AY仍未趕及到會議廳,立法會主席梁君彥以提出動議嘅議員不在席為由,不處理其動議,直接宣布休會。事後AY被建制派同網民揶揄,當年補選以「關鍵一席」做宣傳,結果就「關鍵缺席」。

稱「睇緊國歌法直播」 拍片道歉

根據《議事規則》第33(1)條,動議議案嘅議員需要起立動議議案,所以AY不在席,議案就無法處理。AY事後鞠躬道歉,承認當時睇緊國歌法直播,疏忽咗,「今次不能動議議題,唯一責任係我楊岳橋」。佢形容今次教訓係「一心不能二用」,有兩個非常重要嘅議題喺面前,都要作出決定。AY話日後會尋求所有機會提出相關議題,亦會商量由黨友盡快提出單程證動議;今年內亦會提出相關私人條例草案。

葉太:你撻Q喎

AY除咗見記者道歉,亦拍片向公眾道歉,但網民似乎唔接受,幾百個留言中絕大部分都狠批AY,除咗笑佢「關鍵缺席」,部分人指佢犯低級錯誤,因為記者會可以事後睇番嘛。

建制派唔放過抽水機會,新民黨主席葉劉淑儀其後喺立法會見到AY就忍唔住話「你撻Q喎」;民建聯葛珮帆就喺fb講,自己提動議抽咗12次、等咗兩年半都抽唔到,竟然有議員抽到動議但失蹤,批評佢「關鍵一席,原來係關鍵一刻唔見人」。

一向關注單程證嘅新同盟范國威對未能辯論覺得可惜,未來都會考慮提出類似動議。

相關字詞﹕單程證 楊岳橋 立法會

上 / 下一篇新聞