港聞

港聞二

下一篇
上一篇

水泉澳邨現非法放租 一晚索價1980元

【明報專訊】近期不時有公屋單位疑被住戶放到網上平台放租,沙田區議員丘文俊喺facebook貼圖,懷疑有人喺Airbnb平台放租水泉澳邨單位,一晚收費成1980元。Emily噚日向丘文俊了解過,佢話前晚收到街坊報料,自己上網查閱後特地撮圖,以防放租廣告被下架,結果廣告其後真係消失咗。丘文俊話已聯絡專責打擊公屋濫用嘅房署官員,引述對方承諾會調查事件。

房署承諾調查

從撮圖所見,公屋單位內裝修頗為四正,放租人填寫單位介紹時,寫上「4位(住客)、2間臥室、3張牀、1間衛浴」。丘文俊話,今次係第一次聽到水泉澳邨懷疑有住戶放租,佢希望房署可以加強打擊有關情况,舉例房署可以放蛇假扮內地遊客,搵出違規住戶。

丘文俊強調,公屋住戶放租單位會為社區帶嚟好大影響,人流變得複雜,影響治安同鄰里關係,更甚嘅係放租者係濫用公屋資源,因為現時有好多市民排幾年隊先上到樓,現時卻有租戶疑似攞單位嚟營業,對輪候公屋嘅人唔公道,放租者亦違反公屋租約,甚至觸犯無牌經營旅館嘅相關條例。

相關字詞﹕公屋 丘文俊 水泉澳邨

上 / 下一篇新聞