港聞

港聞二

下一篇
上一篇

雪櫃建功? 黃錦星0電費贏林超英

【明報專訊】為宣傳慳電,環境局長黃錦星同天文台前台長林超英又再比併慳電。黃錦星噚日喺facebook發文,公開12月嘅電費單,全個月只係用咗70度電,扣除燃料費特別回扣及電費紓緩計劃補貼金額後,電費為0蚊,完全係無得輸。

黃錦星話自己一家幾口,去年人均每日用電量約0.5至1.5度,與現時香港家庭人均每日用電量約5度比較明顯較低,所以局長話一般家庭用電量應有下調空間,提醒市民睇睇自家電費單圖示「平均每日用電量」,除以家中人口,就可以簡易比較!星星局長向前台長下戰書,tag對方問「你收到最新電費單未呢」。

林超英太太為慳電冲凍水涼

林超英其後就喺星星局長fb留言回應,話未收到新電費單,舊年10至12月家人平均用電量只係1.7度電,較局長多少少,但佢話原因係佢屋企嘅雪櫃好舊,耗電較多,唔及得局長嘅「超慳電雪櫃」,所以「我是軍械競賽輸的」,又話雪櫃仲可以用,丟咗好可惜,所以佢輸畀局長,其實係為咗環保。林超英仲話「近來太太改用凍水冲涼」,希望再慳多啲電。

上 / 下一篇新聞