港聞

港聞二

下一篇
上一篇

迪士尼新遊戲 玩家「縮到」蟻咁細

【明報專訊】等到頸都長,香港迪士尼樂園全新主題互動遊樂設施「蟻俠與黃蜂女:擊戰特攻!」宣布喺3月31日開幕。呢個令Marvel同迪士尼迷期待已久嘅新設施,仲係全球第一個以蟻俠與黃蜂女為主題嘅遊樂設施𠻹。

首個蟻俠主題設施 3‧31開幕

呢個新設施將會係「鐵甲奇俠飛行之旅」嘅延續,邪惡組織會派出幾千隻機械蟲軍團入侵「神盾局科技館」。玩家要同蟻俠、黃蜂女一齊合作,要縮細到蟻咁細,呀,唔係,係玩家嘅視覺好似蟻咁細,坐上神盾局最新研發嘅「突擊」戰車,手持「電磁脈衝槍」,打低壞人同機械蟲軍團!

Emily噚日同華特迪士尼幻想工程創意監製戴司涵(Dale Sheehan),同埋高級創意總監湯傑斌(Bryan Thombs)傾過,佢哋率先透露今次新設施用到3D技術做場景設計,玩家會「縮小」,進入機械蟲體內去打低佢哋,視覺效果逼真。玩家仲可以同同伴鬥高分。

電影中飾演蟻俠同黃蜂女嘅保羅活特和伊雲祖蓮莉莉,會同玩家一齊體驗投入Marvel超級英雄世界,故事用香港做背景,聽講佢哋兩個嘅對話更會有香港本土味道!Emily聽聞,呢個新遊樂設施一如Marvel過往風格,入面會有彩蛋,但要留畀玩家自己入場發掘。

上 / 下一篇新聞