港聞

港聞二

下一篇
上一篇

林鄭:我年過60 日做10多個鐘 稱調高長者綜援資格非不近人情

【明報專訊】政府將申請長者綜援資格由60歲提高至65歲,下月實施,泛民、建制政黨齊聲批評政府呢個做法。特首林鄭月娥噚日被記者問到,喺未有法定退休年齡時,咁樣做係咪不近人情;日前話做特首好辛苦、但自己做得幾輕鬆嘅林太,就親身示範60歲以上都可以自力更生。61歲嘅林太話以自己為例,「我都超過60歲,今日仲係每日10多個鐘頭咁做嘢」,話政策改動唔係為慳錢,更唔係不近人情,而係反映社會人口老化、壽命延長嘅現實。

林太班子1/3年屆花甲

林太解釋,改動係同醫療券等政策嘅合資格年齡睇齊,話60歲以上係唔能夠工作嘅說法已經同社會脫節,「我諗你唔會接受,我都唔會接受」。

睇番數據,呢個改動會令60歲以上、65歲以下想申請綜援嘅長者,只可以申請2525元嘅健全成人綜援,比長者綜援少1060元,對呢個安全網有需要嘅長者,可能都要更努力工作掙錢生活。

林太又話,聽到好多意見係推動中年同年長人士進入勞動市場嘅訴求,政府都有津貼畀僱主聘請年長者。

Emily睇過,林太班子3司13局嘅司局長中,超過三分之一人都超過60歲,年齡最大者分別係自言打起條呔返工都覺興奮嘅政務司長張建宗,以及財經事務及庫務局長劉怡翔,兩人都係68歲。

相關字詞﹕長者綜援 張建宗 林鄭月娥

上 / 下一篇新聞