港聞

港聞二

上一篇

劉國勳兩師弟當選村長

【明報專訊】剛過去嘅星期日舉行嘅鄉郊代表選舉,結果已塵埃落定,本身係北區區議員嘅民建聯立法會議員劉國勳,亦非常關心今次選舉,前晚就喺facebook上載相片,原來參選沙頭角南涌原居民代表選舉嘅鄭世亮,係佢中學師弟,第一次參選就喺該選區以最高票當選。劉國勳話佢至少有兩個中學師弟做村長,除咗26歲嘅鄭世亮,原來仲有早前已自動當選嘅民主黨黃大仙區議員沈運華。

讀過3間中學

劉國勳話先後讀過3間中學,沈運華係佢保良局馬錦明中學嘅師弟;鄭世亮就係佢預科時讀田家炳中學嘅師弟。佢話讀書時唔識沈運華,其後都有傾吓偈,得知沈自動當選村長後,都有打畀對方祝賀,交換吓想法,仲話遲啲要同對方食飯。

至於鄭世亮,劉國勳話對方中學時曾幫佢助選同陪佢點票,佢透露鄭世亮嘅爸爸係村長,所以亦有鼓勵鄭世亮試吓參選,好高興鄭世亮一選就成功。劉國勳笑言北區嘅中學都幾多人從政,又話北區區議會嘅同事、工聯會嘅黃宏滔同曾勁聰,則係佢初中時就讀東華三院甲寅年總理中學嘅師兄弟。

相關字詞﹕劉國勳 鄉郊代表選舉

上 / 下一篇新聞