港聞

港聞二

下一篇
上一篇

紮鐵工人唔准除衫開工

【明報專訊】唔少人認為建造業人工高,可以話係另類好工,紮鐵工人初入行日薪1000蚊,如果做咗3至5年,技術水平達註冊熟練技工(大工)資格,日薪可達2520蚊。發展局長黃偉綸噚日喺網誌介紹紮鐵行業,除咗提及呢行人工,建造業議會畢業生魏偉強喺訪問中講吓返工日常,佢話現時工作環境較之前好咗,聽聞以前咩裝備都無,現時就連衫都唔畀除,怕工人會曬傷或畀鐵頭剪口位刮傷。

黃偉綸喺網誌話,建造業訓練局1995年為鋼筋屈紮工設立工藝測試,唔止令紮鐵工可通過評核確認技術水平,提升專業形象,待遇亦隨經驗提升。香港建造學院導師曾俊華就透露,初入行者現時日薪1000元,做到有大工資格就可達2520元。但佢話唔少人對紮鐵行業有誤解,認為工人體魄強健就得,但佢話其實做紮鐵工人心態好重要,要守時、堅持同有責任心,因為除咗體力,工人不時要喺大熱天同戶外工作,要堅定咁將工程完成。

講體力更講毅力

魏偉強話紮鐵工人嘅辛酸不足為外人道,有年12月,佢喺東涌海旁地盤工作,凍到嘴唇發紫都要繼續做。做咗4年嘅佢,現時日薪已有大工待遇。

相關字詞﹕黃偉綸 建造業議會 紮鐵工人

上 / 下一篇新聞