港聞

港聞二

上一篇

普通黨員余若薇 繼續落區寫揮春

【明報專訊】公民黨上月改選,創黨元老、擔任領導層多年嘅余若薇(Audrey)退下火線,連執委都無競逐,現為普通黨員。不過Audrey又點會完全唔理黨嘅嘢?下個月農曆新年,政黨除咗準備年宵檔同市民接觸外,亦會落區寫揮春,Emily聽聞Audrey會繼續為公民黨寫揮春,噚日佢就喺facebook上載佢為公民黨設計嘅利市封,印有佢寫住「豬肥屋潤」嘅墨寶(圖)。

Audrey同公民黨主席梁家傑先後卸下立法會議員工作,但兩人仍然積極為黨落區,據了解,下星期四(10號)至今個月29號,兩人會走勻港九新界擺檔為街坊寫揮春,初步預咗兩人加埋有成55個街站。至於30號至2月4號就係年宵,Emily聽聞Audrey亦已預備每日坐鎮,再為大家寫揮春。政黨年宵唔少得賣嘢,據知公民黨其中一樣產品亦同Audrey有關,就係印有Audrey墨寶、配埋本土情懷相片嘅文件套。

相關字詞﹕揮春 余若薇 公民黨

上 / 下一篇新聞