港聞

港聞二

下一篇
上一篇

社區自救 民主黨利東裝路燈

【明報專訊】港鐵南港島線通車兩年,但喺近利東站嘅新海旁道一帶,一直都冇安裝路燈。民主黨社區主任陳炳洋同Emily講,曾經去信多個政府部門,但都爭取唔到,近日佢索性自己動手安裝,實現「社區自救」。

跑友呻海旁多「地雷」

陳炳洋同Emily講,該路段唔少街坊都會跑步,但有好多「地雷」,例如有艇戶、街坊養嘅狗會喺嗰頭大解,由於冇街燈,有街坊反映跑完步返屋企都「中招」要洗鞋。佢去信多個政府部門要求加裝街燈,路政署話該路段唔係佢哋管理,地政總署話加街燈唔係佢哋職權範圍,康文署就話只能夠研究喺附近公園裝燈,但係該路段又唔近公園,結果都係漆黑一片,現時南區區議會就聘請顧問做緊可行性研究報告。

有見及此,陳炳洋同民主黨另一社區主任陳欣兒日前特意去加裝「路燈」,其實裝備相當簡單,就係用索帶綁住幾盞充電式、可以喺戶外使用嘅燈。佢哋仲呼籲街坊,如果日頭見到啲燈仲開着,可以幫手閂燈慳電,路過可以幫手換電。不過陳炳洋都話,其實呢個係「信任測試」,佢本身安裝咗兩盞燈,翌日其中一盞已經不翼而飛,「好想全段路都加,但唔知(燈)可以『生存』幾耐」。

相關字詞﹕南區 區議會 地政總署 路政署 民主黨 emily

上 / 下一篇新聞