港聞

港聞二

下一篇
上一篇

田北辰憂港人唔生育 「一國兩制點維持?」

【明報專訊】《財政預算案》下月發表,財政司長陳茂波近日都同唔同政黨及議員見面做諮詢,噚日會見咗實政圓桌。召集人田北辰會面後話,建議政府大幅增加子女免稅額、改善幼兒照顧服務等,以增市民生育意欲。田二少仲忍唔住反問,如果香港人自己唔生,一國兩制嘅「兩制」點樣維持落去?「兩制之下香港人買少見少,覺得唔係幾好」。

實政圓桌帶波見財爺

田北辰噚日同實政圓桌嘅區議員、社區主任會見財爺,佢話既然財爺叫大家交個波畀佢,佢哋每個人都買咗個足球,分別寫咗共11項建議。田二少話,最大要求係希望財爺大幅將子女免稅額由12萬提升至20萬元,以減輕納稅人養育子女嘅負擔。佢又建議政府全面資助報讀社區保母課程嘅人、監管保母質素,同埋調高保母薪金。

被問到點睇今年盈餘同派錢,田北辰估計今年盈餘會少過上年,相信政府唔會派錢,社會亦認為派錢唔係長遠持久嘅方法處理盈餘。作為G2000老闆,田北辰話派錢其實對佢最有利,因為大家都會因為咁買多幾套西裝,但佢認為香港有好多長遠問題需要解決,絕對唔會要求派錢。

相關字詞﹕幼兒照顧 免稅 香港人 派錢 財政預算案 田北辰 陳茂波

上 / 下一篇新聞