港聞

港聞二

下一篇
上一篇

議員提動議 EQ撻Q 12次

【明報專訊】立法會議員平日可提出無約束力嘅議員動議,提議案嘅次序抽籤決定。立法會第一大黨民建聯似乎相當黑仔,唔少成員多次提出議案都申請失利,加加埋埋成個黨合共申請失利41次,單係葛珮帆(EQ)一人就申請失利咗12次。

立法會有文件顯示各議員今屆會期、2016年10月起至今3個立法年度獲編排辯論嘅紀錄,亦顯示各議員申請失利嘅次數,唔計主席梁君彥,68名立法會議員中,已有51人獲編配辯論時段,8個議員未曾提出,只得9個議員曾提出辯論但失利,民建聯就佔5人,包括主席李慧琼5次、副主席陳克勤8次、漁農界何俊賢11次,鄭泳舜去年3月先當選,都已失利咗5次。

民記3年失利41次

EQ同無黨派何君堯一樣申請失利12次,至今仍未有機會提動議。EQ同Emily講唔知點解咁黑仔,佢話舊年好多政府法案都拖到好長,令議員議案時間少咗好多,唔少佢本身想提出嘅動議都出唔到,有啲題目就畀其他議員講咗,例如佢想提智慧城市議案,但工程界盧偉國先佢一步提出,不過EQ所提嘅修訂都能夠通過,都叫做好彩咁話。EQ話未來想關注吓離婚家庭,希望抽中。佢話香港有唔少離婚家庭,衍生唔少問題,例如單親媽媽好多時追唔到贍養費,令生活困難,希望政府可以設專責部門處理。

相關字詞﹕葛珮帆 民建聯 emily

上 / 下一篇新聞