港聞

港聞二

下一篇
上一篇

學生十大新聞 山竹榜首 政事無揀

【明報專訊】學友社噚日公布「全港中學生十大新聞選舉」結果,逾7.5萬個中學生選出2018年十大新聞,超強颱風山竹襲港得票率約73.7%,拋離第2位大埔車禍近25個百分點,成為第1位,並遠超上屆首位、「林太成首位女特首」約51%嘅得票率。

27間初選學校提交建議後,學友社再篩選30則候選新聞,喺上年11月19日至12月14日總選,最終159間學校75,505人嘅投票有效。風采中學中五生章晟話,山竹襲港時睇到社交平台啲片,都驚屋企嘅玻璃會吹爆,阿爸返工都喺火車站塞咗兩三個鐘,亦有同學仔話停課後要趕課程。第2位至第10位新聞分別係大埔九巴19死車禍、光纖之父高錕逝世、霍金逝世、泰國少足隊被困山洞、港珠澳大橋通車及超支安全問題、金庸逝世、旺角行人專用區殺街、女童「臨臨」被虐致死、巴士座位被連環插針。

Emily發現,一地兩檢、補選、港府禁止香港民族黨運作等政治新聞都唔入十大,活動籌委會發言人高祖莉就解釋,民族黨等政治新聞涉及法律,中學生未必了解,故排名較後。

相關字詞﹕高錕 大埔車禍 十大新聞 學友社 教育局 山竹襲港

上 / 下一篇新聞