港聞

港聞二

上一篇

運署拍片教的士司機同客溝通

【明報專訊】政府2018年初成立的士服務質素委員會,話要提升的士服務質素。委員會去年11月起到噚日,共推出5條短片,教的士司機點同乘客溝通、建立人際關係、處理衝突等。

「提升現職的士司機的服務質素培訓課程」分5個單元,以短片形式拍攝,每條約5分鐘。片中場景都幾真實,好似乘客趕時間,又覺得司機開得慢,結果雙方口角。短片就教司機對乘客要「聆聽、了解、思量、回應」,又話要「將禮貌變成習慣」,用多啲「神奇字句」例如「唔好意思」、「請問」等,咁先可以雙贏喎!片中又教司機保持微笑、開工前準備多過法例規定嘅100蚊散紙做找贖等。

司機大哥只要上運輸署或委員會嘅網頁,及運輸署YouTube頻道,就可以睇片。之後仲可以免費預約參加運輸署安排嘅考試,及格者可獲證明書,詳情今個月公布。

上 / 下一篇新聞