港聞

港聞二

下一篇
上一篇

公民廣場升旗 先要芝麻開門

【明報專訊】俗稱「公民廣場」嘅政府總部東翼前地早前重開,但旗杆平台附近其後就擺咗花盆,兩個月前更加畀圍板封住。事緣行政署早前開展綠化工程,包括喺旗杆平台設置固定花槽,增加土壤並加設排水管道等等,工程近日已經完成,由相片可見,花槽大約1米高。行政署回覆Emily話,建造工程預算費用約為98萬元,實際開支就有待核算。

預算98萬 固定花槽完工

驟眼睇,花槽係完全包圍成個旗杆平台,民主黨立法會議員林卓廷就觀察到,花槽有一部分似乎係「神秘門」同花盆,質疑職員日後係咪要先開「神秘門」,再移走重重花盆陣,先可以升降國旗?

阿廷又同Emily講,以往如果喺該處集會,主持人企喺旗杆平台上,其實比較容易控制秩序,質疑政府花咁多公帑建造工程,結果反而令集會更唔方便,妨礙市民表達意見。佢強調,現場咁多保安、警察,其實唔需要驚市民會衝上去旗杆平台。

行政署:有留通道供升旗

行政署回應話,改善工程旨在優化種植環境,設計上亦有為升旗儀式預留通道;但就冇解釋到底設計上點樣預留空間畀職員升旗。

上 / 下一篇新聞