港聞

港聞二

下一篇
上一篇

黃玉山:消委會無牙,但識嗌

【明報專訊】消委會主席黃玉山做咗6年,今日任期屆滿。佢回顧6年工作時話,消委會工作有挑戰又有意義,又話好多人話消委會係無牙老虎,「我哋無牙,但我哋識嗌,牙就喺海關嗰度」。佢仲話在位嗰時,消委會7次點名譴責商舖,大多數都執笠收場。

做咗6年 今任期屆滿

黃玉山做主席期間,就誕生咗3.5條爭取咗好多年嘅消費權益相關法例,分別係一手樓銷售條例、商品說明條例、競爭法,剩低嗰0.5條就係政府預計今個立法年度訂立嘅服務合約冷靜期。

黃玉山對自己張成績表幾滿意,又提到當年獲政府委任時,自己零經驗,上場唔夠一個月,政府就推「限奶令」,佢要即時鑽研各區奶粉行情,開記招表明消委會立場,不過佢話自己上手快。講起聽日就接棒做消委會主席嘅大律師公會前主席、資深大律師林定國,佢無咩贈言,只係賣廣告話明年消委會出報告講借貸問題。

上 / 下一篇新聞