港聞

港聞二

下一篇
上一篇

社區主任買超聲波機掃街坊

【明報專訊】地區人士各出其謀,提供嘅服務愈嚟愈特別,本身係放射師嘅觀塘油麗社區主任王偉麟,就特意以1500元購入一部手提超聲波機,話喺街上都可以為街坊做初步身體檢查,包括睇吓有冇生腎石,以至脂肪肝咁,如果有明顯問題,就可以即刻建議對方做詳細檢查。

本身係放射師

王偉麟本身係油塘油麗邨嘅居民,所以揀番自己嗰區做地區工作。佢同Emily講,曾有街坊話腰痛,佢用超聲波機一照,就發現街坊疑似有水腎症,嚴重起嚟可能會腎衰竭;另外有街坊話個身痛咗好耐,但去聯合醫院就要排期到2020年先有得照,結果佢用超聲波機一睇,就發現街坊似乎有膽石,即刻建議對方做詳細身體檢查。

睇吓有冇腎石脂肪肝

醫療專業亦令王偉麟短時間內睇到街坊身體可能有問題,有次佢見有街坊塊臉、對眼都好黃,懷疑黃疸病,即刻叫對方去醫院檢查,但對方因為慳錢,寧願自己買藥食。半年後嗰位街坊嘅老婆就同王偉麟講,老公早前瞓覺時突然離世,相信同佢觀察到嘅身體問題有關,最終兩個都講到喊。

近日立法會財委會通過用5000萬喺觀塘興建音樂噴泉,王偉麟就向Emily慨嘆,點解葵青區可以用區議會撥款做基層醫療項目,但觀塘就咁樣運用公帑。佢話油塘有10萬人口,但冇政府門診,反問到底公帑係咪可以用得更好呢。

上 / 下一篇新聞