港聞

港聞二

上一篇

產假未必放足 陳家珮三年抱兩

【明報專訊】新民黨喜事重重,該黨立法會議員容海恩8月結婚,預計明年初BB就會出世,佢黨友、南區區議員陳家珮(Judy)噚日就生咗個女,加埋兩年前生嘅大仔,「三年抱兩」湊成「好」字。《施政報告》提出將產假由10星期加至14星期,南區區議會早前亦一致通過,豁免因分娩而缺席會議出席率嘅時限,由10周增至14周,Judy話佢立即受惠,但估計自己都唔會放足14周,因為地區唔少新年活動佢都要出席。

Judy噚日喺丈夫陪同下開刀產女,佢話BB重約7磅,暫時改咗英文名Hannah,希望阿女都鍾意。大仔下星期就兩歲生日,Judy話事前都有訓練定大仔,買公仔BB畀佢玩,希望佢唔好因為妹妹出世呷醋,又一直同阿仔講肚內BB係屬於佢嘅。阿哥仍未見到妹妹,Judy話都有啲緊張。

Judy話,上次坐月一個月左右,區內有事發生,佢要立即處理,所以當時都放唔足10星期產假,估計今次都差唔多。Judy噚日喺facebook上載同老公、BB嘅合照,唔少人留言祝福,該黨主席葉劉淑儀就叫Judy,「生完女就要俾心機重新搏殺啦!」

相關字詞﹕陳家珮 新民黨

上 / 下一篇新聞