港聞

港聞二

下一篇
上一篇

北區花鳥蟲魚展 有張建宗DNA

【明報專訊】政務司長張建宗噚日出席「北區花鳥蟲魚展覽2018」,司長親自出席地區展覽開幕,算得上非常重視;原來佢同北區、以致呢個展覽都大有淵源。張建宗致辭時話自己到北區係返「娘家」,原來佢1986年擔任北區政務專員,係首名華人出任,因此對北區好有感情。佢話當時住喺太子道,作為「九龍仔」去未城市化嘅北區返工係「一個教育」,又話當時辦事處無現時咁方便,但已留意到北區好有潛質。

當年促成花展升級轉型

司長憶述當時有次參觀花展,其時花展已做咗10年,於是佢建議「升級轉型」,擴大範圍,等參觀者更認識北區除咗郊野亦有保育一面。司長話,「花鳥蟲魚展當年就係我一手促成,有我嘅DNA!」佢話當時北區4個鄉委會一致同意佢個建議,到今日活動已去到42屆,花鳥蟲魚展亦有32年。

司長話,呢個展覽已經變成全港活動,今年更為學生注入STEM元素,形容將推動科技教育融入社區係難能可貴。

上 / 下一篇新聞