港聞

港聞二

下一篇
上一篇

聶德權演唱聖誕歌 盼市民多陪身邊人

【明報專訊】聖誕將至,政制及內地事務局長聶德權噚日帶埋10幾個同事,應「兒童發展配對基金」邀請,到中環置地廣場唱聖誕歌,雖然局長謙稱唔識唱歌,但佢同同事都唱得有板有眼。聶德權形容聖誕節係關心身邊人嘅節日,希望大家多同身邊人相聚,唔好只以通訊軟件聯繫。

聶德權同一班同事先與20幾名小學生合唱Jingle Bells同We Wish You a Merry Christmas,小學生離開後,佢哋再唱5首歌,可謂「高音甜、中音準、低音勁」,有局方人都笑言,呢班同事唔係隨便搵,係真係識唱歌。

兒童發展配對基金近年都有舉辦唱聖誕歌活動,邀請唔同人參與,以鼓勵基層下一代,聶德權話做社署署長時都參加過。佢形容青年係社會未來棟樑,政府同社會都要鼓勵佢哋,提供良好環境畀佢哋成長同發揮。

上 / 下一篇新聞