港聞

港聞二

下一篇
上一篇

范國威幫街坊整金句貼圖

【明報專訊】聖誕節臨近,議會陣線幾名立法會議員噚日就同成班助理開聖誕party輕鬆一番,議員朱凱廸一向重視環保,開P亦要求各助理自備餐具。各議員又準備禮物抽獎,議員毛孟靜(Miss Mo)就講笑話,驚畀朱凱廸鬧,所以用舊報紙包禮物,陳志全(慢必)更索性唔包禮物𠻹。

議會陣線開P 舊報紙包禮物

唔少議員都趁長假期外遊,區諾軒同慢必不約而同選擇去泰國玩,范國威就會去日本滑雪,佢話要好好珍惜阿女未入大學、仲同佢哋去旅行嘅日子。去旅行前范國威都會繼續落區,佢仲有新諗頭,嚟緊落區會為街坊整WhatsApp貼圖,只要街坊畀張相佢,佢就可以喺5分鐘內幫人設計有埋金句喺旁邊嘅貼圖,佢話親自幫街坊整嘅好處係可以同大家有更多直接互動,自己亦製作咗多款有佢個樣嘅貼圖,又教埋慢必點整。范國威話希望呢類落區活動可以增加同年輕選民交流。

至於Miss Mo就話今年兩個仔將會帶埋另一半返港,其中細仔女朋友係首次見面,透露阿仔女朋友係來自一帶一路地區,母語係俄文,而佢個仔大學時有讀俄文;大仔太太係墨西哥人,佢話自己家庭都好「全球化」,假期除咗留港敘天倫,亦考慮一齊去台灣玩幾日。

上 / 下一篇新聞