港聞

港聞二

下一篇
上一篇

任何仁差啲變藍毛衫人

【明報專訊】消防處「任何仁」以藍色緊身裝造型,引來網民瘋傳討論。噚日Emily同任何仁嘅幕後創作班底傾偈,負責編劇同導演嘅署理救護監督(新界西南)周詠賢話,團隊係由十幾個救護員組成、自家創作,因為「技術唔夠專業,所以設計一啲線條簡單嘅公仔」。

十幾個救護員創作

咁又係,要求負責救人嘅救護員設計精美嘅figure又好似真係強人所難。咁本身英姿颯颯嘅救護員,要著任何仁套緊身衫,係咪背負好大心理包袱?周sir話,雖然套衫有啲緊,「著起嚟有少少辛苦」,但手足好有共識,為咗向公眾灌輸「任何人都可以伸出援手救人」嘅概念,大家好願意。

套衫「著起嚟有少少辛苦」

周sir話消防處之前為咗推出「擊活人心課程」宣傳海報,想設計一個卡通人物,又希望反傳統、唔用消防處徽號嘅紅色,而選用藍色,當時推出嘅藍色卡通公仔就係任何仁嘅雛形。之後周sir希望再行多步,以影片宣傳,所以8月起推出「擊活人心」三部曲影片。任何仁要出鏡,周sir團隊本身諗住畀件毛毛公仔衫佢著,但毛毛公仔衫冇得伸出手指,做唔到CPR(心肺復蘇),所以最後搵咗緊身藍色衫。

「擊活人心」第三集講述香港拳擊手曹星如克服恐懼,用體外心臟去顫器(AED機),救咗一個運動期間心臟病發嘅爸爸。周sir話呢個故事源自真人真事,令佢體會到「救一個人,等於救一個家庭」,呼籲大家勇敢伸出援手。

因任何仁熱潮,愈來愈多人有興趣學急救。救護監督(社區應急準備課)吳宛茵話每日都收到市民打電話嚟,話有興趣報讀「擊活人心」課程,負責課程嘅救護員都做唔停手。不過,佢就話社區應急準備課已備好應付市民需求,叫大家唔使擔心。

上 / 下一篇新聞