港聞

港聞二

下一篇
上一篇

民建聯又益街坊 派買餸車休閒鞋

【明報專訊】區議員、地區人士不時派嘢益街坊,過往多數派揮春、月曆等,近日有人同Emily講,民建聯派嘅嘢愈嚟愈多元,包括買餸車、休閒鞋等。

民協嘆要打升級版資源極限戰

民協總幹事李庭豐前日去屯門開會,發現屯門區議會主席梁健文辦事處門外有架貨車裝咗幾百部買餸車(圖),買餸車印住梁健文個樣同聯絡方法等,李庭豐講笑話架車仔上個宣傳牌都幾難拆。根據淘寶,一架買餸車大概59至123元人民幣,李庭豐感嘆民主派要面對一場升級版「資源極限戰」。Emily嘗試聯絡梁健文,截稿前未獲回覆。

另邊廂亦有人報料,話民建聯屯門友愛南區議員曾憲康,喺友愛北一帶派鞋,友愛北區議員譚駿賢話民建聯過往試過派收音機,佢認為鍾意拎嘢嘅都係同一班人,與其擔心不如做好個案,佢又笑話民建聯派嘅鞋得兩款,會唔會成條邨撞晒鞋?曾憲康就同Emily講,今次係幫服務合作單位忙,慈善轉贈斷碼休閒鞋,大概有60至70個街坊攞,強調只要係對街坊有益嘅事都會做。

上 / 下一篇新聞