港聞

港聞二

下一篇
上一篇

Tanya織頸巾睇審計報告減壓

【明報專訊】佔中九子案審訊中,法庭噚日下晝提早休庭,九子之一嘅公民黨陳淑莊(Tanya)隨即返立法會工作,非常勤力。Emily見Tanya嘅布袋凸咗兩支長冷針出嚟,細問下原來Tanya喺審訊日子都會有「兩寶」隨身,包括帶住冷針同毛球,趁午飯空餘時間織頸巾,另一樣嘢就係審計報告!Tanya話織頸巾可以幫到佢減壓,清除雜念,因為要好專心,一分心就會織錯。

Tanya話近日織緊嘅頸巾係為社民連之前籌款晚宴而織,當時有人以1.8萬元買下佢親手織頸巾嘅「期票」,Tanya喺立法會會議廳外示範織頸巾,顯得好熟手,更笑言要向大家誠徵顏色碼為「8108」嘅草綠色冷球,因為差一個冷球先夠。佢話其實一早已經識織頸巾,無生疏,之前花咗幾日已完成另一條。

Tanya話另一樣休庭空閒時會做嘅,就係睇吓審計報告,佢話講起都覺得自己「好黐線」,但隨即畀大家睇,入面有佢嘅筆記、用熒光筆間晒重點。Tanya噚日返到立法會無耐亦有見記者,回應港鐵沙中線問題,佢笑言好耐無「扑咪」,事前都要清清喉嚨。

相關字詞﹕陳淑莊

上 / 下一篇新聞