港聞

港聞二

下一篇
上一篇

工聯會倡再改議規 區軒諷如「盧溝橋事變」

【明報專訊】民主派議員噚日喺立法會會議廳高呼口號被趕,特首林鄭月娥上任後新設嘅「短問短答」環節首度腰斬。事後工聯會見記者時表達憤怒,其間民主派議員區諾軒(區軒)一度同工聯會議員舌戰,火藥味濃,黃國健(KK)更鬧佢「江湖規矩都唔識」,表明會向建制派「班長」廖長江提出係咪有需要再修改《議事規則》,區軒其後就諷刺佢哋搞緊「盧溝橋事變」。

黃國健批「唔識江湖規矩」

話說KK見記者時,話工聯會成員想問特首民生議題,準備得好辛苦,對泛民「做騷」感遺憾。區軒喺佢哋背後高呼「我都準備咗㗎」、「你咪做緊騷囉」,麥美娟(Alice)即刻擰轉面高聲鬧「可唔可以文明啲」,KK亦鬧佢:「連江湖規矩都唔識,咁樣點搞?」

區軒其後批評,工聯會提出再修改議事規則無異於「盧溝橋事變」,藉詞答問大會無法舉行,掩蓋梁君彥不當裁決事實,其實係項莊舞劍、志在沛公,搵藉口滿足想修改議規嘅野心。工聯會陸頌雄就向Emily批評佢比喻不恰當,強調盧溝橋事件係日軍插贓嫁禍,但今次事件由泛民引起,「我哋只係不同政見之爭,佢用民族大義、法西斯侵略者比喻,非常不恰當」。

相關字詞﹕民族 陸頌雄 區諾軒 議事規則 工聯會 emily

上 / 下一篇新聞