【明報專訊】渠務署成立30周年，邀請市民一齊設計渠蓋，仲有機會製成實物。唔講唔知，原來香港渠蓋有好多款，仲有唔同「密碼」隱含喺渠蓋設計上，例如「圓清方濁」。
渠務署介紹，香港渠蓋形狀分兩大類，圓形渠蓋代表雨水渠，方形渠蓋下面就係污水，用嚟提醒渠務人員留意會有沼氣。香港不時會有「偷鐵黨」撬走渠蓋，渠蓋上嘅「H↑K」字樣就象徵咗係政府物料，回收場唔可以隨便收買。而渠蓋角嘅「H」、「M」、「L」就係用嚟顯示負重能力，「H」係重級，可以承受重型貨車行駛，「L」係輕型，適用於一般行人路。
渠蓋設計主要有3個一定要有嘅元素，包括須由兩個三角形組成，以減輕渠務人員體力負荷；表面必須凹凸；同埋要有兩個夾縫方便渠務人員拉起。今次嘅渠蓋設計比賽，就要求喺呢3個特點上，再以特定嘅主題設計，例如渠務署30周年、河道活化、沙田污水處理廠遷岩洞等，今個月15日就截止，詳情可瀏覽網址（www.dsdmanholecompetition.hk）。