港聞

港聞二

下一篇
上一篇

兩代財會主席聚首 卿姐叫陳健波胸襟闊啲

【明報專訊】民主黨前主席劉慧卿噚日喺網台節目訪問立法會財委會主席陳健波,兩代財會主席聚首一堂,卿姐都忍唔住指教「後輩」一番。雖然卿姐聽議員講,波哥主持會議好過前任吳亮星,但一講到波哥之前喺電台節目提到,相信「明日大嶼」前期研究撥款可以十零個鐘搞掂,卿姐就叫佢「要闊啲胸襟」、「可唔可以忍吓」;波哥就解釋冇理由前期研究都唔畀人做。

波哥大讚阿廸提問仔細

波哥話,財會現時最大問題係,官員有啲嘢唔能夠透露畀公眾聽,只能重複既定答案,「如果有人扮瞓,點叫都唔醒」;又話𠵱家自己質問官員都愈來愈多。波哥又話,雖然唔少人唔鍾意啱啱被拒參選鄉郊代表嘅朱凱廸,但佢就大讚阿廸問問題其實好仔細、好認真。

稱陳凱欣當選冇咁麻煩

九龍西補選啱啱過咗,波哥不諱言,若工黨李卓人當選佢會相當「頭痕」,擔心人哥同議會脫咗節兩年,會以為《會議程序》改變之後,仲可以好似以前咁拉布,而陳凱欣當選對佢而言就冇咁麻煩。波哥爆料話,以前有個議員係佢見到而唔會打招呼嘅,因為覺得有啲人冇底線,「唔係陳志全,但都係姓陳」。卿姐追問係咪陳偉業?波哥就話唔開名。

相關字詞﹕財委會 陳健波 劉慧卿 明日大嶼 立法會

上 / 下一篇新聞