港聞

港聞二

下一篇
上一篇

侯志強:積極考慮參加新東補選

【明報專訊】近日唔少人關注社民連梁國雄被DQ嘅新東議席會否舉行補選,由於長毛仲打緊官司,補選至今未有消息,上水鄉事委員會主席侯志強噚日上港台節目《城市論壇》時,被問到如果有新東補選會唔會參選,侯強就話會積極考慮,不過𠵱家時間尚早,要到時先決定。佢又話曾經選過新東,當時準備工作唔係太足夠,但察覺到鄉郊仲有大量票源「等緊有慧眼嘅人發掘」。

以「強姦」比喻港獨

城市論壇噚日亦談及立法會議員朱凱廸參選鄉郊代表一事。一向言論惹火嘅侯強,就將朱凱廸對是否支持港獨嘅回應同「強姦」作類比,佢話強姦大家都知唔合法,畀人問到時梗係大家都話唔支持,「但迷姦呢?又曖昧話唔答,仲衰過強姦」。

侯強又豪言,新界人與生俱來都係反對港獨,講到興起時仲叫朱凱廸拎塊鏡照吓自己個樣,「冇鏡就屙篤尿照一照,就知自己咩人、咩樣、忠於邊個國家」。言論咁惹火,如果侯強將來參選,睇嚟選舉論壇又有一番舌劍唇槍。

相關字詞﹕城市論壇 鄉郊代表選舉 補選 朱凱廸 選舉 立法會

上 / 下一篇新聞