港聞

港聞二

下一篇
上一篇

陶君行道歉 話無意暗示杜汶澤投共

【明報專訊】社民連前主席陶君行早前同中央政策組前全職顧問劉細良、「佔中十死士」徐少驊主持網台節目,其間阿陶話杜汶澤「突然咁本土咁反共」,但老婆田蕊妮就冇被封殺,言論被指暗示杜汶澤投共,引起爭議,杜汶澤喺facebook嬲到話「撞到你三個一定打X死你哋」。繼劉細良道歉後,陶君行噚日亦表達歉意,杜汶澤亦都話,既然阿陶肯道歉,佢亦當粉筆字抹咗佢。

妄言「戲子無情」 願意收回

陶君行噚日喺facebook發公開信,對言論引起杜汶澤連番憤慨深表歉意。阿陶話杜汶澤不時為港人鳴不平,經常發表與中共相左嘅言論,所以提及田蕊妮喺內地工作嘅疑問,並話佢嘅疑問係建基於中共一貫政治打壓模式,疑惑點解杜太冇被全面封殺。佢強調有關疑問冇暗示杜汶澤「投共」嘅意思,如果引起誤會,佢表達歉意。

杜汶澤促以後唔好亂屈人

阿陶又承認,回應徐少驊「杜汶澤是真心本土」時,佢妄言一句「戲子無情」並不恰當,願意收回。阿陶同時亦叫杜汶澤收回有關暴力襲擊嘅言論,形容不單涉刑事成分,暴力亦有礙表達及發表意見嘅自由。杜汶澤其後就喺fb話「件事就咁算啦」,又話希望陶君行以後唔好亂咁屈人;呢單風波總算告一段落啦。

上 / 下一篇新聞