港聞

港聞二

下一篇
上一篇

林太露口風 安排明年訪美

【明報專訊】中美貿易戰隨時打到嚟香港,特首林鄭月娥、行會成員同高級官員噚日出席立法會午宴,席間民主黨黃碧雲都關心貿易戰,仲問林太幾時出訪美國,林太就答話安排咗明年訪美。

噚日呢場宴會,有7個民主派議員出席,主要係民主黨同專業議政成員。法律界郭榮鏗(Dennis),仲同立法會主席梁君彥坐喺林鄭月娥兩旁。Dennis話,同林太、商務及經濟發展局長邱騰華提及稍後會到美國,仲同邱騰華分析美國民主黨同共和黨、成個朝野都睇得香港好實,如果香港民主自由收窄,美國可能會改變對港政策。Dennis話去到美國會呼籲政黨、商界唔好做「將香港推落懸崖嘅嘢」,例如唔好取消對港嘅特別政策,因為對任何人都無好處,邱騰華都同意佢嘅方針。不過Dennis同時都話,會呼籲美國朝野睇實香港一國兩制、法治落實情况。

重啟政改 聶德權反問泛民ready未

民主黨黃碧雲亦抽中同林鄭月娥、政制事務局長聶德權一齊坐主家席,佢喺席間把握機會問聶德權幾時重啟政改,局長問番佢民主派「ready未」,碧雲即刻話幾時都ready喎,仲立即話希望大家傾吓人大8.31框架係咪有迴旋空間。

立法會主席梁君彥喺致辭時話,好高興行政立法關係有實質改善,上個立法年度通過咗27項法案,財委會審議民生項目嘅進度都大有改善。佢話行政立法關係改善得來不易,希望政府多向議員解釋政策,聆聽議員意見,大家互相尊重、各司其職為市民服務。

上 / 下一篇新聞