港聞

港聞二

下一篇
上一篇

卿姐獲LSE榮譽博士 亞洲女性首人

【明報專訊】從政逾四分之一世紀嘅民主黨前主席劉慧卿,噚日透露前晚收到英國倫敦政治經濟學院(LSE)校長Minouche Shafik來信,話LSE將向佢頒授社會科學榮譽博士學位。學位係頒予具卓越成就同改善社會嘅人物,卿姐話對獲頒學位感到好開心,更透露從朋友口中獲悉,自己係香港首名獲頒有關學位嘅人。Emily翻查資料,卿姐唔單止係香港第一,更係亞洲首名女性獲頒呢個學位,認真威水。

頒予成就卓越改善社會者

卿姐本身有LSE碩士學位,佢噚日同Emily講,話前晚收到封信時好驚訝,因為月初同校長喺香港一場舊生活動碰頭,對方都無提到會頒授學位畀佢。

卿姐話封信只提及LSE會喺咩情况下頒授學位,無特別提到佢個人成就,但佢相信LSE今次係肯定佢過往推動民主自由,以及維護人權法治嘅工作。

同國際政壇有唔少聯繫嘅卿姐又話,自己1988年已開始去聯合國聽委員會聆訊,做咗記者同議員分別十幾年同廿幾年,即使退下議會火線仍繼續推動民主自由,相信LSE都認同佢嘅工作。

頒授學位典禮明年7月下旬舉行,卿姐話到時會抽空出席,佢亦懷緬往事,話對上一次返母校,已經係10年前返去向學生演講喇。

上 / 下一篇新聞