港聞

港聞二

下一篇
上一篇

解放軍清塌樹惹疑慮 李家超:阻做義工 匪夷所思

【明報專訊】超強颱風「山竹」襲港後,上個月多個郊野公園都見到解放軍駐港部隊身影,協助清理塌樹同垃圾。人民力量陳志全(慢必)噚日喺立法會問及,當局會唔會設機制,等市民可以知悉解放軍外出活動以減低憂慮,保安局長李家超就反問,「點去管理軍人呢?你同我都無資格講,你又唔係軍人,我又唔係」。李家超又話解放軍清除垃圾,其實有市民要求影相,同埋畀手指公多謝,「(解放軍)做義工都要阻止,我真係匪夷所思」。

慢必噚日問及,解放軍喺政府無要求協助下清除塌樹,行動係咪違反《駐軍法》,同埋會唔會促請駐港部隊做義工時唔好著制服,以免被誤會正在執勤。慢必舉例,就算屋企樓下有人拍戲,演員著警察制服,都要通知大廈居民,等大家唔好擔心,「係咪(解放軍)話賣旗,就可以著住制服全香港咁行?」

李家超回應時重申,駐港部隊係應邀參與一項公益活動,無牴觸《基本法》、《駐軍法》等規定,又強調回歸21年以來,駐港部隊參加過嘅公益活動不勝枚舉,包括植樹、捐血活動等,但政府冇詳細紀錄。李家超又話,軍服係軍人身分象徵,穿著出席公益活動可以增強榮譽感同使命感,亦能令市民更認識駐港部隊。

相關字詞﹕emily 解放軍 郊野公園 李家超 塌樹 山竹

上 / 下一篇新聞